مـلامـح العـيـد

2020-08-01 13:36:07


قصيدة
مـلامـح العـيـد

للشاعره : نـهـى حـمــزه

لما ملامح العيد تتوه
مع خطوط الكفوف
هتصدقوا ...
فتحت كفى الصبح
يووووه
أنا مبعرفش أقرا الكف
شفت الخطوط زى الورق ع الرفوف
أصفر لونه زى لون القمح
قولت خير
مع إنه قديم ومتلخبط
ومفيش ملامح عيد
ولا أطفال بتتنطط
عفاريت وعاملين صف
مين أخد العديه يتشقلط
ملامح العيد تاهت ؟
ولا إحنا اللى من نفسنا تهنا
دار الزمن وضيع منا معالمنا
يا عقرب الساعه ليه قالوا عليك عقرب
بتلدغ وتاخد عمرنا
ونفسنا تعطب
وملامح العيد مننا تهرب
خطوط كفوفنا إتغيرت
وأوراق رفوفنا إبتلت
بفكر صار أجدب
يا ملامح العيد زهزهى
وبهللى ونورى
إتشمرى وكبرى
وسع السما أرحب

بقلمى🖋
نهى_حمزه
Nohaa Hamza